Аргентинада жиноятчиларга банкни тунаш учун ярим дақиқа кифоя қилди

Аргентина пойтахти Буэнос-Айресдан 30 км узоқликда жойлашган Тигр шаҳридаги банк бўлими 4 нафар қуролланган жиноятчи томонидан 30 сония ичида тунаб кетилди. Todo Noticias телеканали маълум қилишича, жиноятчилар ўзлари билан 750 минг песо (47 минг доллар) олиб кетишган.   

Кузатув камераларидан олинган видеоёзувда ниқобларда бўлган икки жиноятчи Mercedes-Benz машинасидан тушиб, банкнинг ойнаванд эшигини болға билан синдиришаётгани акс этган. Бу пайтда милтиқлар билан қуролланган қолган икки жиноятчи эса машинада бўлган. 14 сониядан кейин жиноятчилар банк биносидан банкноматларга юкланиши керак бўлган пуллар боғлами билан чиқиб, автомобилга ўтириб ғойиб бўлишган.

Ўғриликни амалга ошириш учун 24 сония кетган. Яна 6 сония жиноятчилардан бирига машина олдида тушиб қолган буюмни олиш учун кетган. Телеканал маълумотларига кўра, жиноятчилар ўғрилик вақтида бирорта ҳам ўқ узишмаган. 

Айни вақтда полиция воқеани тергов қилмоқда. У берган маълумотларга кўра, жиноятчилар машинани банкдан бир неча мавзе узоқликда ташлаб, бошқа машинага ўтириб кетишган.