Афғонистон Россиядан ёрдам сўради

Афғонистон ҳукумати миллий иқтисодиётни қўллаб-қувватлаш учун 100дан ортиқ иншоотни тиклашда ёрдам беришни сўраб, Россияга мурожаат қилди. Бу ҳақда «Известия» нашри ёзмоқда.

Таъкидланишича, Афғонистоннинг Москвадаги элчихонаси савдо-иқтисодий масалалар бўйича атташеси Муҳаммад Қосим афғон томони Россия бизнесини тўлиқ қўллаб-қувватлашига ваъда берди. 

«Афғонистондаги кўплаб иншоотлар совет мутахассислари томонидан барпо қилинган ва уларни Россия тиклаши мумкин. Уларнинг сони жами 124та. Улар жумласига «Саланг» туннели, Кобулдаги нон комбинати, Политехника университети, «Жангалак» автотаъмирлаш заводи ҳамда Пули-Хумри шаҳридаги электрстанция киради», — деган Муҳаммад Қосим. 

Дипломатнинг сўзларига кўра, мамлакатдаги иншоотларни тиклаш масаласи аввал ҳам Россия томони билан муҳокама қилинган. Афғонистон президенти Ашраф Ғани ҳам Россиянинг иқтисодий иштирокини қўллаб-қувватлайди.