«Бунёдкор»нинг барча футболчилари ойлиги Жепаровнинг бир ойлик маошига тенг экани айтилди

«Бунёдкор» бош мураббийи Сергей Лушчан жамоадаги муаммолар ҳақида гапира туриб, клуб жамоада етакчилик қилиши мумкин бўлган Сервер Жепаров каби футболчини сотиб ололмаслигини айтди.

«Етакчи? Агарда майдонда ҳар учта тўп узатмадан кейин адашаверсанг, хатоларга йўл қўяверсанг, қандай қилиб етакчи бўласан? Етакчи бу майдонда деярли хато қилмайдиган, жамоани ўз ортидан эргаштира оладиган футболчи бўлади. Бизда бу каби футболчи йўқ! Адашмасам, буни учинчи йилдирки қайтаряпман. Аввал Қосимов бўларди, аммо ҳозир бизда Миржалол йўқ.

Жепаровни таклиф этиш керак? Нималар деяпсиз, унинг бир ойлик маошини бизда бутун жамоа ойлик қилиб олади. Агарда ярим ойлиги бўлмаса...

Жепаров бой инсон, у  ўзига шуни эп кўра олади. Чунки у кучли футболчи. Буни исботлаган ва бугун топаётган пулларига пешона тери билан эришган», деган Лушчан.