Эквадорда 250 млн долларлик кокаин мусодара қилинди

Эквадор полицияси 5,53 тонна кокаинни мусодара қилди. Унинг бозор нархи 250 млн долларга баҳоланмоқда. Мамлакат ички ишлар вазирлигига кўра, гиёҳванд модда Европага жўнатиш учун тайёрланган. Бу ҳақда ТАСС хабар бермоқда.

Гиёҳванд моддалари савдогарлари ва уларнинг юкини ушлаш бўйича махсус амалиёт 12 май куни ўтказилган. Кокаин Эквадорнинг Ла-Либертад портидан денгизга чиқиб, Панама канали орқали Испанияга йўл олган кема бортида бўлган. У Тинч океанида портдан чиққанидан кўп ўтмай ушланган. Кеманинг кўпмиллатли экипажи аъзолари, шунингдек, жиноий гуруҳга раҳбарлик қилган Испания ва Колумбия фуқаролари ҳам қўлга олинган. 

12 май куни Германия божхоначилари ҳам Эквадордан келтирилган бананлар солинган совутгич контейнеридан 41 кгдан ортиқ кокаинни мусодара қилган эди.