«Миллиард долларлик жанг». Макгрегор Мейвезер билан жанг қилиш бўйича шартномани имзолади

Аралаш жанглар санъати (MMA) жангчиси ирландиялик Конор Макгрегор америкалик собиқ боксчи Флойд Мейвезер билан жанг ўтказиш бўйича келишувни имзолади.

«Бундай рекорд даражадаги келишувни имзолаш мен учун шараф. Бу тарихий келишувнинг биринчи қисми бажарилди. Бу ишга алоқадор барчани табриклайман. Энди биз Эла Хэймон ва унинг боксчиси имзосини кутамиз. Яқин кунларда», — дея Макгрегорнинг сўзларини келтирган TheMacLife.com.

Келишувнинг молиявий жиҳатлари ошкор этилмаган. ОАВ бу жангни «миллиард доллар учун жанг», деб атамоқда.

Флойд Мейвезер ва Конор Макгрегор ўртасида жанг бўлиб ўтиши мумкинлиги ҳақидаги хабарлар ўтган йилнинг ноябрида, UFC чемпиони боксчилик лицензиясини олганидан кейин пайдо бўлди. Ирландиялик жангчи Мейвезер билан жанг учун 100 миллион доллар ишлаб олиш истагини билдирганди.

Кейинроқ Мутлақ жангчилик чемпионати (UFC) президенти Дана Уайт Мейвезер ва Макгрегор жанги учун ҳар икки спортчига 25 миллион доллардан тўлашга тайёр эканини маълум қилган эди, бироқ ҳар икки спортчи таклифни жиддий қабул қилмади. Шундан сўнг Дана Уайт мазкур беллашув ирландиялик жангчининг UFC билан шартномаси якунига етсагина бўлиб ўтишини айтди.

Март ойида Мэйвезер Макгрегор билан жанг қилиш учун спортга қайтишга тайёрлигини маълум қилди.