Оқ уй ходимлари қанча маош олишади?

АҚШ президенти Дональд Трамп маъмурияти Оқ уй ходимларининг маошлари ҳақидаги маълумотларни АҚШ конгрессига тақдим қилди.

Маълум қилинишича, ушбу ҳужжат Оқ уй сайтида жойлаштирилди ва 16 саҳифадан иборат. Ҳужжатда Оқ уй ходимларидан энг кам маошни Миллий иқтисодий кенгаш директори ва Трампнинг иқтисодий сиёсат бўйича катта маслаҳатчиси Гэри Кон олиши кўрсатилган. Унинг маоши йилига бор-йўғи 30 минг долларни ташкил қилар экан.

Энг катта маошни эса Трампнинг сиёсат бўйича катта маслаҳатчиси Марк Хаус олар экан, унинг маоши йилига 187 минг долларни ташкил қилади. Шунингдек, Оқ уй матбуот котиби Шон Спайсернинг маоши ҳам энг катталаридан бири бўлиб, у йилига 179,7 минг доллар олади. Спайсернинг ёрдамчиси Сара Сандерс йилига 165 минг долларлик маош олади.

Таъкидлаш жоизки, Трампнинг маслаҳатчилари ҳисобланадиган унинг қизи Иванка Трамп ва куёви Жаред Кушнер ҳужжатга кўра умуман маош олмайдилар. Трампнинг ўзи эса президент этиб сайлангандан кейин ўзига белгиланган 400 минг долларлик маошдан воз кечган ва у йилига 1 доллар миқдоридаги рамзий маош олади.

"Қонунга кўра мен барибир йилига бир доллардан кам бўлмаган маош олишим керак, шунинг учун маошим бир доллар бўла қолсин", деб айтган Трамп.