Nokia йил охирига қадар яна қанча смартфон чиқариши маълум бўлди

Тармоқда Nokia компанияси 2017 йилда еттита смартфон чиқаришни мўлжаллаётгани ҳақида маълумот пайдо бўлганди. Яқин ойлар ичида эса тўртта янги қурилма тақдим этилиши мумкин.

Биринчи бўлиб Snapdragon 430 процессорида ишловчи Nokia 6 гаджети тақдим этилди. Кейинчалик Mobile World Congress 2017’да Nokia 3 ва Nokia 5 намойиш этилди, улар MediaTek MT6737 ва Snapdragon 430 чипларига эга. Энди эса Nokia Nokia 2, Nokia 7, Nokia 8 ва Nokia 9 моделларини чиқариши кутилмоқда.

Nokia 2’да Snapdragon 212 ёки MediaTek процессори ўрнатилади. Бу эса, қурилма анча ҳамёнбоп бўлишидан дарак беради, деб ёзмоқда Gizmochina.

Nokia 7 Snapdragon 630 чипсетига эга бўлса, Nokia 8 Snapdragon 660’дан фойдалангани туфайли анча кучли смартфонга айланади. Бундан ташқари,  "саккизинчи" Nokia “еттинчи”сидан иккита Zeiss камераси билан ажралиб туради. Кутилишича, гаджет 2K экрани, 6 ГБ оператив хотира ва 64 ГБ доимий хотирага эга бўлади.

Nokia 9 Snapdragon 835’да ишлайди. Унда 5,3 дюймли QHD-дисплей, 13-мегапикселли камера ва 8 ГБ оператив хотира бўлади.

Nokia вакилларининг маълум қилишича, 2017 йилда планшетлар чиқарилмайди. Бундан ташқари, Nokia 4 смартфони ҳам бўлмайди, сабаби тўрт рақами баъзи давлатлар маданиятида салбий образга эга экан. Кутилишича, Nokia 9, Nokia 8, Nokia 7 ва Nokia 2 IFA 2017’да тақдим этилади.