АҚШ Сурия қуролли мухолифати гуруҳларидан бири билан алоқаларни узди

Америка Қўшма Штатлари Сурия қуролли мухолифати гуруҳларидан бирини қўллаб-қувватламасликка қарор қилди. Бу ҳақда Ироқ ва Сурияда ўтказилаётган Inherent Resolve ("Тебранмас қатъият") ҳарбий амалиёти штаби расмий вакили, Америка қуруқликдаги кучлари полковниги Райан Диллон маълум қилди. 

Унинг журналистларга айтишича, гап Сурия жанубида фаолият юритувчи "Шуҳада ал-Қарятайн" гуруҳи ҳақида бормоқда. Бу тузилма шу дамгача АҚШнинг "ҳамкорларидан бири" бўлганини Диллон тасдиқлаган. 

Бироқ мазкур тузилма "бир томонлама тартибда, АҚШ ва коалиция рухсатисиз ёки ҳаракатларни мувофиқлаштирмасдан белгиланган ҳудудлардан ташқаридаги ҳамда ИШИДга қарши курашишга қаратилмаган ҳаракатларда иштирок этди", - деган полковник. Шу муносабат билан, "коалиция уларнинг амалиётларини қўллаб-қувватламайди".

Диллон, шунингдек, Пентагон бу каби қарорни биринчи бор қабул қилаётганини ҳам тан олган.