Франциялик туристнинг 1956 йилги Ўзбекистонга саёҳати (фотолар)

Француз олими, тарихчиси ва Франция коммунистик партияси аъзоси Жак Дюпакье (Jacques Dupâquier) 1950-70-йилларда собиқ иттифоққа уч марта саёҳат қилган, бошқа жойлар билан бир қаторда 1956 йилда Ўзбекистонга ҳам келган.

Кейинроқ Франция ижтимоий фанлар институт директорига интервью бера туриб, Жак Дюпакье ўз саёҳатини шундай хотирлаган: «Москвада бир неча кун бўлганимиздан кейин Тошкентга — Ўзбекистон пойтахтига учдик. Биз 3200 метрдан баландга кўтарила олмайдиган эски винтли самолётларда парвоз қилдик ва мен нафас ютиб соатлаб совет Ўрта Осиёсини томоша қилиб кетдим. Тошкент эса шаҳар марказида сталинча урфда лойиҳаланган ягона шоҳ кўчага эга лойдан қурилган шаҳар экан. Орадан 10 йил ўтиб, уларнинг барчаси вайрон бўлган (1966 йилги зилзила назарда тутилмоқда). Мен шаҳар бўйлаб кўп сайр қилдим, бозорни томоша қилдим, ёпинғич ёпиниб олган аёлларга кўзим тушди, масжидга кирдим, расмий шахслар билан учрашдим, уларнинг ҳар бирига рус кишиси ҳамроҳлик қилар эди. Мендан ҳам кўра уларни кўпроқ кузатишаётгандек таассурот уйғонарди».

«Москвадан Тошкентга парвоз қилаётган чоғимда иллюминатор орқали кўплаб суратлар олдим. Қандайдир паллада биз концлагер узра парвоз қила бошладик ва стюардесса бу ерни суратга олиш тақиқланганини айтди. Сўнгра у кабинага қайтди, мен эса суратга олишни давом эттирдим, таржимон ёки бирор киши менга монелик қилмади».