РФ мудофаа вазирлиги: АҚШ РҚМ Россия баллистик ракеталарини уриб тушира олади

АҚШнинг ракеталарга қарши мудофаа тизими бугунги кунда нафақат ракета учирилганини аниқлай олади, балки Россия баллистик ракеталарини уриб тушириш имкониятига эга. Бу ҳақда Россия мудофаа вазирлиги вакили Александр Емельянов БМТ Бош Ассамблеяси биринчи қўмитаси доирасида ташкил этилган РҚМ бўйича Россия-Хитой брифингида маълум қилди. 

“Америка РҚМ тизимининг ахборот-разведка воситалари ҳозирданоқ нафақат Россия баллистик ракеталари учирилгани аниқлаб, уларни парвози чоғида кузатади, балки баллистик ракеталарнинг жанговар блокларини уриб тушириш учун РҚМ ўт очиш тўпламларига нишонни белгилаб беради”, - деган Емельянов. 

У РФ ракеталарини Америка ракеталари уриб туширишига доир фаразларни ҳам тақдим қилган. 

Емельяновнинг қўшимча қилишича, АҚШ Европадаги РҚМ тизими универсал қурилмаларини қанотли ракеталар билан яширинча жиҳозлаши мумкин. Бу ҳолатда Америка қанотли ракеталари Россиянинг Европа қисмини тўлиқ нишонга олиши мумкин бўлади.