Америка агентлиги Facebook ва Google мусулмонларга қарши рекламаларни жойлаштирганини аниқлади

Американинг Facebook ва Google компаниялари ўтган йилги АҚШ президентлиги сайловларида ўз ижтимоий тармоқларида муҳожирлар ва мусулмонларга қарши реклама хабарлари жойлаштиришни қўллаб-қувватлаган. Бу ҳақда Bloomberg агентлиги хабар қилмоқда.

Маълум бўлишича, гап Secure America Now ("Американи ҳозироқ хавфсизлантиринг") номли консерватив ташкилотининг реклама ролиги ҳақида бормоқда. Ижтимоий тармоқларда жойлаштирилган видеороликлар ва бошқа ахборотлар, хусусан, Ислом динига эътиқод қилувчиларнинг АҚШга киришини чеклашга қаратилган эди. 

Бу ташкилот, Bloomberg агентлигининг аниқлик киритишича, ўтган йилги сайловларда демократлар номзоди Ҳиллари Клинтонга қарши бўлган. Secure America Now жойлаштирган рекламаларда дунёда шариат меъёрлари жорий этилишининг хавфидан огоҳлантирилган, демократлар террорчиларга қиёсланган. Бу каби рекламалар АҚШнинг “бир қарорга келмаган” штатлари аҳолисига қаратилган, деб ёзади Bloomberg.

Иккала технологик компаниялар мутахассислари Secure America Now билан жойлаштирилаётган эълонлар бўйича қалин ҳамкорлик қилган. Google вакиллари 2016 йил июнида Secure America Now вакиллари билан учрашган ва реклама хабарларини қандай яхшилаш мумкинлигини муҳокама қилишган. Facebook эса, ташкилот видеоролигининг биридан янги форматдаги видеороликлар синовини ўтказишда фойдаланган. Ўша видеода АҚШ ҳудудида террорчилик уюштирган муссулмонлар фотосуратлари кўрсатилган. 

Ҳозирча, Facebook бу даъволарга изоҳ беришдан бош тортган. Google вакили эса, компания алалоқибат, Secure America Now томонидан жойлаштирилган бир қанча роликларни тўсиб қўйганини билдирди.