Россиядаги энг харидоргир смартфон қайси бўлаётгани маълум қилинди  

2017 йил сентябрда Россияда энг кўп миқдорда сотилган смартфон iPhone SE бўлди. Бу ҳақда Mobile Research Group етакчи таҳлилчиси Эльдар Муртазинга иқтибос келтирган ҳолда "Ведомости" нашри хабар берган. 

2017 йил бошидан ушбу сегментда етакчиликни Samsung Galaxy J1 ушлаб келган, бироқ августда вазият ўзгарган ва Apple’нинг гаджети биринчи позицияга чиққан. Жумладан, сентябрда iPhone SE’дан 119 минг дона, Galaxy J1’дан эса 90 минг дона сотилган.

Бироқ Россия смартфонлар бозорининг қамраб олиниши кўлами бўйича АҚШ корпорацияси Жанубий Корея гигантидан ортда қолмоқда: 2017 йил сентябрида Apple’нинг бозордаги улуши 14 фоизни, Samsung’ники эса 26,6 фоизни ташкил қилган. 

Маълум қилинишича, россияликлар томондан iPhone X смартфонига талаб катта бўлмоқда. "Связной" компаниясида маълум қилинишича, мижозларнинг 50 фоиздан кўпроғи ушбу смартфоннинг 256 гигабайтлик моделига буюртма беришган.