Италияда Сицилия мафиясининг “чўқинтирган она”си ушланди

Италия полицияси “босслар босси” Тито Ринанинг ўлимидан сўнг, Сицилия мафиясини бошқаргани гумон қилинаётган аёлни ҳибсга олди. Мария Ангела Ди Трапини мафияга қарши чиққан тадбиркор Либеро Грассини ўлдирганлиги учун умрбод қамоқ жазосига маҳкум этилган Салватор Мадониа вазифасини бажаришда айбланмоқда. 

У 7 декабрь куни 200 дан ортиқ полициячи, вертолётлар ва махсус ўргатилган итлар жалб қилинган амалиётда қўлга олинган. Ди Трапини эрининг буйруқларини Мадониа гуруҳига етказиб, ижросини назорат қилгани туфайли 7 йилга қамалган эди. 49 ёшли аёл тўданинг қамалган аъзоларининг оилаларига молиявий кўмак бериш борасида ҳам қайғурган. 

Расмийларга кўра, Ди Трапини икки йил аввал озод этилганидан сўнг, босснинг хабар етказувчиси бўлишдан тортиб бошқа тўдалар иштирокида Cosa Nostra жиноий гуруҳини қайта тиклаш устида иш олиб борганини телефон орқали қилинган суҳбатларнинг аудиоёзувлари исботлайди.
 
Ёзувларнинг бирида гуруҳ аъзоларидан бири унга "уйнинг хоними" дея мурожаат қилади. 

"Озодликка чиқарилгач, у Cosa Nostra гуруҳига қайтди ва унда муҳим ўрин тута бошлади", - деган прокурор Салво Де Луса. 

Сицилиянинг маъмурий маркази Палермо шаҳрида Ди Трапини билан бирга яна 24 киши қўлга олинган. 

Ди Трапини Cosa Nostra етакчиси бўлган вақтда “Махлуқ” лақаби билан машҳур Рина ўлганидан сўнг, мафия раҳбарлигини ўз қўлига олди. 

“Махлуқ” мафия сирларини ошкор этмоқчи бўлган отанинг 13 ёшли фарзандини ўғирлаб кетган ва кислотада эритиб юборгани билан ҳам шундай ном қозонган эди.