2021 йилга бориб самолётлар 75 фоизга босмадан чиққан деталлардан иборат бўлади

Авиасозлик 3D-босма технологиялари учун ноёб соҳа ҳисобланади. Бу ерда, масалан, тиббиёт соҳасидагидек компаниялар кўп эмас, лекин шунга қарамай, энг катта пуллар айнан шу ерда ва улар йирик силжишларни кутмоқда. Ҳозирча 3D-босмани авиасозликда у қадар кенг кўламда қўлланмайди, бироқ прототипларни босмадан чиқаришда, асбоб-ускуналар ва чекланган миқдордаги деталларни тайёрлашда мазкур технологиядан  фойдаланилмоқда. 3ders шу ҳақида хабар берди. 

Самолёт ишлаб чиқарувчилар 3D-технологияни янада кенг татбиқ қилишдан келадиган фойдани ҳисоблаб чиқишмоқда. Масалан, Boeing ҳисоб-китобларига кўра, титандан тайёрланувчи компонентларнинг ўзини босмадан чиқариш ҳар бир 787 Dreamliner самолётида 2 миллиондан 3 миллион долларгача тежаш имконини берар экан. Гап шундаки, принтер камроқ чиқинди қолдиради, унга камроқ металл талаб қилинади. Бугунги кунда компания самолётларида 50 мингга яқин 3D-принтерларда босмадан чиққан деталлар қўлланилади. 

Gartner тахминларига кўра, 2021 йилга бориб янги тижорат ва ҳарбий самолётларнинг двигатель ва фюзеляжлари ўртача 75 фоизга босмадан чиққан деталлардан иборат бўлади.  

Режаларга кўра, янги технологиялар фақатгина самолётларга нисбатан қўлланилмайди. Улар, шунингдек, ракетасозликка ҳам таъсир кўрсатади. Илон Маск ва Жефф Безосдан кетган муҳандислар томонидан асос солинган Relativity Space стартапи космик ракеталарни ишлаб чиқариш учун улкан 3D-принтерларни қўллайди. Австралиялик муҳандислар эса реактив двигателларни муваффақиятли лойиҳалаштириб, 3D-принтердан чиқаришди ва синовдан ўтказишди. 

Boston Consulting Group халқаро консалтинг компаниясининг прогнозига кўра, 3D-босма жаҳон бозори 2020 йилга бориб 15 миллиард долларни ташкил қилади (бугунги кунда - 5 миллиард доллар), 2035 йилга бориб эса 350 миллиард долларгача, яъни 70 карра ўсади.