Қайиққа сакраб чиқиб олган тимсоҳ сайёҳларни ваҳимага солди (видео) 

АҚШнинг Флорида штатида тимсоҳ бир неча сайёҳ бўлган қайиқнинг ичига сакраб тушиб олди. Бу ҳолатнинг видеоси билан Daily Mirror нашри бўлишди. 

Кичик катер соҳил бўйида дам олаётган тимсоҳдан бир неча метр узоқликда сув чеккасида турган. Сайёҳлардан бири тимсоҳни тасвирга олаётган бўлган. 

Кадр ортида, тахмин қилинишича, катер эгасининг овозини эшитиш мумкин. У “Бу ердан бемалол унинг белини силай олишингиз мумкин, шундайми?”, деб ҳазил қилади.

Тимсоҳ қайиқдаги одамлар шовқинидан безовталаниб, бир сакрашда қайиқ ичига тушиб олади. Шунда одамлар ваҳимада қайиқнинг нарига чеккасига ўтиб оладилар. Тимсоҳ қайиқнинг четидаги тўсиқлар орасидан суқилиб, сувга тушиб кетади. Маълум қилинишича, воқеа оқибатида ҳеч ким жабрланмаган.