Hyundai CES-2018 кўргазмасида водородда ишловчи кроссоверини тақдим қилади

CES-2018 истеъмолчилик электроникаси кўргазмасида Hyundai автомобиль брендининг водород ёқилғи унсурларида ишловчи янги кроссоверининг оммавий тақдимоти бўлиб ўтади.     

Шу сабабли компания янги кроссоверининг расмий суратларини ва видеосини намойиш қилди. Тахмин қилингандек, водородда ишловчи кроссовер 2017 йил ёзда Сеулда тақдим қилинган Hyundai Next Generation FCEV моделининг ўзидир. 

Hyundai Next Generation FCEV модели водород учун 3 та баллон ва оралиқ аккумулятор билан жиҳозланганди. Машинанинг қуввати 163 от кучини, юриш захираси эса 580 км.ни ташкил қилади.

Маълум қилинишича, оммавий тарзда ишлаб чиқарилувчи янги кроссовер Advanced Driver Assistance System деб номланган, ҳайдовчига ёрдам бериш тизими билан жиҳозланади. Тизим ҳақида батафсил маълумотлар CES-2018 кўргазмасида маълум қилинади.

Дастлабки маълумотларга кўра, кроссовер Европа, АҚШ ва Жанубий Кореяда сотувга чиқарилади. 

CES-2018 кўргазмаси 9-12 январь кунлари АҚШнинг Лас-Вегас шаҳрида бўлиб ўтади.