Ҳавайидаги сохта тревогадан кейин одамлар ўз “таассуротлари” билан бўлишдилар

13 январда Ҳавайида штат томон баллистик ракета учаётгани ҳақида тревога эълон қилинганди. Одамларга иложи борича тезроқ бошпана топиш буюрилган ва бу машғулот тревогаси эмаслиги маълум қилинган. Кейинроқ аниқланишича, бу огоҳлантириш хатолик туфайли берилган. Бироқ у аҳоли ўртасида “каттагина” ваҳима кўтарилишига сабаб бўлган. Одамлар тревогадан кейин ўзларини қандай тутганлари ҳақида сўзлаб беришди.

Журналист Сара Доншейнинг айтишича, у ваҳимага тушган қариндошларининг хабаридан уйғониб кетган. “Оилам шимолий соҳилбўйида эдилар. Улар гаражга беркиниб олишган. Менинг онам ва синглим йиғларди. Аниқланишича, сохта тревога бўлган, бироқ кўплаб одамлар ваҳимага тушдилар”, деб ёзган журналист твиттерда.

Голливуд актёри Жим Керри эса бу огоҳлантиришни “ақлдан оздиргудек” деб атади. “Мен Ҳавайида эдим. Уйғониб кетиб, 10 дақиқалик ҳаётим қолганини англадим”, деб ёзган Керри.

Маҳаллий депутат Мэттью Лопрестининг айтишича, у хабарни жиддий қабул қилган ва унинг уйи ядровий заряд таъсири радиусида бўлиши мумкинлигини ўйлаб, ваҳимага тушган. “Биз фарзандларимиз билан ваннахонага беркиниб олдик ва Тангрига илтижо қилардик. Мен яқинларим ва танишларимга қўнғироқ қилиб, уларга бошпана топишлари кераклигини айтардим”, деб эслаган бўлиб ўтган воқеани депутат. 

Маҳаллий Star Advertiser нашри журналистларининг ёзишича, огоҳлантиришдан кейин Ҳавайи пойтахти Гонолулунинг бош шоссесида машиналар ҳаракатланишдан тўхтаб, ҳайдовчилар машиналарини тарк этиб, туннел ичига ва кўприклар остига яширина бошлашган.

Тревога ёлғон эканлиги ҳақидаги хабар 38 дақиқадан кейингина юборилган. Штат губернатори Дэвид Айж ушбу воқеа учун аҳолидан узр сўраган ва у фавқулодда хизмат ходимларидан бирининг хатоси туфайли юз берганини айтган. Айжнинг айтишича, ушбу ходим огоҳлантириш тизими синовдан ўтказилиши вақтида “ҳақиқий огоҳлантириш тугмасини” босиб юборган.

АҚШ президенти Дональд Трамп ушбу вазиятга изоҳ бериб, ракета ҳужумлари ҳақида ёлғон хабарлар бошқа такрорланмаслигига умид билдиришини айтган.