Аҳмадбойга машинасини топширганлардан 105 нафари ўз автомобилларини қайтариб олишди

Молиявий пирамида асосчиси Аҳмад Турсунбоевга машинасини топширган бироқ ҳали расмийлаштириб бермаган 100 дан ортиқ киши ўз машиналарини қайтариб олишди. Бу ҳақда «Ўзбекистон-24» телеканалининг 31 январь кунги «Ахборот» дастурида хабар қилинди.

Телеканал хабарига кўра, Аҳмадбойга гаровга топширилган 105та автомобиль эгаларига қайтарилган. Автомобилини қайта қўлга киритганлардан бири шундай дейди:

— Ўғлим Аҳмадбой ҳақида ошналаридан эшитиб, қизиқиб қолиб, машинасини олиб бориб берган ва шу ерда адашган. Умид қиламан, энди одамлар бунақа аҳмоқликка учмайди. Буёғига ҳаммаси яхши бўлади.

«Чиноз ҳалол чорва» ва «Чиноз авто ҳамкор» МЧЖларнинг муассиси бўлган Аҳмадбой Турсунбоев одамлардан бир йилда икки баробар қилиб қайтариш шарти билан катта маблағлар, бойликлар ва автомашиналарни ноқонуний равишда қабул қилганликда айбланиб, 2016 йилда қамоққа олинган эди.

KUN.UZ А.Турсунбоев устидан суд жараёни бўлиб ўтаётгани, гувоҳлар кўрсатмалари тингланаётгани ҳақида хабар қилган эди. Бироқ суд нима билан тугагани, айбланувчига ҳукм ўқилган-ўқилмагани номаълумлигича қолмоқда.