Ўзбекистонлик енгил атлетикачи Чехиядаги халқаро мусобақада 1-ўринни эгаллади

Ўзбекистонлик енгил атлетикачи Надия Дусанова Чехиянинг Брно шаҳрида бўлиб ўтган Brněnská laťka-2018 мусобақасида қатнашиб, баландликка сакраш бўйича беллашган спортчилар орасида энг яхши натижани қайд этди ва олтин медаль билан мукофотланди. Енгил атлетика федерацияси матбуот хизмати шу ҳақида хабар берди. 

Brněnská laťka-2018 мусобақаларида дунёнинг 9 мамлакати - Чехия, Италия, Польша, Беларусь, Украина, Люксембург, Черногория, Хорватия ва Ўзбекистоннинг энг кучли спортчилари тўпланишди. 

Ўзбекистонлик Надия Дусанова биринчи уринишда 190 см, иккинчи уринишда - 192 см натижа билан 1-ўринни эгаллади. 

Иккинчи ўринда 190 см натижа билан черногориялик Мария Вукович номи қайд этилди. Учинчи ўрин эса 186 см натижа билан чехиялик Лада Пейчалова томонидан банд этилди. 

Бундан аввал Дусанованинг Теҳронда бўлиб ўтган Осиё чемпионатида ҳам олтин медаль соҳибаси бўлгани ҳақида хабар берган эдик. Унинг навбатдаги мусобақаси 9 февраль куни Франция шаҳрида бўлиб ўтади.