“Мерседес” Женевада илк серияли электрокроссоверини намойиш қилади

Mercedes-Benz компанияси Женева автосалонида ўзининг илк серияли электрокроссовери EQC ва дизель-электр гибридлари қаторини намойиш қилади. Бундай машиналардан бири C400d EQ Power модификацияси бўлиб, у электр двигателда 50 км гача йўл юра олади.

Гибрид тизим негизида охирги авлоддаги OM 654 дизель мотори ётади. Бу 2 литрли, 4 цилиндрли двигатель бўлиб, тўлиқ алюминийдан тайёрланган ва пўлатдан ишланган поршенларга эга. 195 от кучига эга двигатель илк бор 2016 йилда янги E-Class’да ўрнатилган.

EQC кроссовери янги EQ электрокарлари қаторида биринчи модел бўлади. Ушбу кроссовернинг нишонаси бўлган Generation EQ концепти 2016 йил сентябрда тақдим қилинган. Машина умумий қуввати 408 от кучини ташкил қилувчи иккита электромотор билан жиҳозланган. Моторлар сиғими 70 кВт-соатдан кўпроқ бўлган литий-ионли аккумуляторлардан қувватланган. Машина тўлиқ аккумуляторларда 500 км йўл боса олган.

2017 йил сентябрда EQC’га буюртмалар олина бошлаган. Бу таклифдан Норвегия аҳолисигина фойдалана олган. Буюртмани расмийлаштириш учун 20 минг Норвегия крони (2,5 минг доллардан кўпроқ) миқдорида депозит киритиш керак бўлган. 

Женевада электрокроссовер ва гибридлардан ташқари 4 эшикли Mercedes-AMG GT Coupe, C-Class синфидаги янги седан ва универсал тақдим этилади. 

Жорий йилда Женева автосалони 8 мартдан 18 мартгача фаолият юритади.