42 ёшида чанғи учишни бошлаган мексикалик Олимпиада қаҳрамонига айланди

Бир неча ойгина олдин чанғи спорти билан шуғулланишни бошлаган мексикалик Герман Мадрасо Пёнгчангдаги Олимпиаданинг чанғи спорти бўйича 15 км лик пойгасида иштирок эди. Эътиборли жиҳати  шундаки, спорт билан шуғулланишни болалигидан бошлайдиган аксарият олимпиячилардан фарқли ўлароқ, Герман 42 ёшида чанғи билан шуғулланишни бошлаб, бор-йўғи бир неча ой ичида Олимпиадага йўлланмани қўлга кирита олди. Бундан ташқари, унга Олимпиаданинг очилиш маросимида ўз давлати байроқдори бўлиш ишониб топширилди.   

Мадрасо мусобақа ғолиби швейцариялик Дарио Колоньядан 26 дақиқа ортда қолганига қарамай, мухлислар ва пойга иштирокчилари чанғичини қизғин олқишлаб, табриклай кетишди. Мексикалик марра чизиғини давлати байроғи билан кесиб ўтгач, қолган иштирокчилар уни кўтариб олдилар. Спортчи 15 кмлик масофани 59,35 дақиқада босиб ўтди. 

Олимпиадагача Мадрасо Техасда яшаган ва югуриш ҳамда триатлон билан шуғулланган. У Пёнгчангга бориш учун пойга велосипедларидан бирини сотиб юборишига тўғри келган.

Мексикалик чанғида учишни ёқтириб қолгани ва у билан шуғулланишни давом эттиришини айтган. 

Мадрасо билан биргаликда тонгалик Пита Тауфатофуа ҳам машқ қилди. Тауфатофуа Риодаги ёзги Олимпиадада тхэквондо мусобақаларида иштирок этган. У ҳам ўзини чанғи спортида синаб кўришга қарор қилган. Айтиш жоизки, Тауфатофуа Мадрасодан бироз яхшироқ натижа қайд қилди. У мусобақада иштирок этган 119 нафар чанғичидан маррага бир юз ўн тўртинчи бўлиб келди.