Ўлим ёқасида турган хитойлик ўзига эътибор қаратиш учун пулларини соча бошлади

Хитойда кўчада юрак хуружидан ўлишига бир бахя қолган эркак ёрдам беришлари илинжида ён-атрофдагиларнинг эътиборини жалб қилиш мақсадида антиқа йўл тутди. Бу ҳақда South China Morning Post нашри хабар бермоқда.

Шицзячжуан шаҳрида поездга шошаётган Ли исмли бу эркакда темир йўл станциясига бир неча метр қолганда юрак хуружи юз берган. Эркак ерга йиқилиб тушган. Уни йўтал тутиб, ҳеч кимни ёрдамга чақира ҳам олмаган, дорилари идишини ҳам оча олмаган. Ён-атрофдагилар эса ўзларига тўхташни лозим топмаганлар. Шунда эркак эътибор жалб қилиш учун ёнидаги пулларини улоқтира бошлаган. Эркакнинг бу иши фойда берган ва унинг бундай ноодатий хатти-ҳаракатига кўчани патрул қилаётган полициячи эътибор қаратган.

“Дастлаб мен уни шунчаки маст деб ўйладим. Яқинроқ келибгина вазият қанчалик жиддийлигини кўрдим”, деб эслаган воқеани полициячи.

Полициячи эркак йиқилишидан олдин рюкзагини титкилаётганини кўрган. У эркакка дорисини қабул қилишда ёрдам бериб, зудлик билан шифокорларни чақиртирган.