IBM бургадек келадиган микрокомпьютер яратди

АҚШнинг IBM компанияси IBM Think 2018 анжуманида митти компьютерни тақдим қилди. Бу компьютерни кўриш учун микроскоп керак бўлади, деб хабар бермоқда Mashable портали.

Компания вакилларининг айтишича, компьютер ўлчами туз кристали ёки бургадек келади.  Қурилманинг платаси x86 ҳисоблаш чипида қурилган, у ўз ичига “бир неча юз минг транзистор”ни олган. Микрокомпьютернинг таннархи 10 центдан камроқни ташкил қилади.

Бундай қурилма, албатта, унумдорлиги билан мақтана олмайди, бироқ “буюмлар интернети” сегментига (ақлли музлатгичлар, чироқлар ва бошқалар) асқатиши мумкин. Шунингдек, қурилма блокчейн негизида ишлаши керак бўлади. IBM’нинг тадқиқотлар бўлими раҳбари Арвинд Кришеннинг айтишича, яқин 5 йилда бундай компьютерлар оммавий равишда маиший техникага ўрнатилади.