Порошенко Украинанинг энг бадавлат одамлари ўнталигидан чиқиб кетди

“Фокус” нашри талқинига кўра, 2016 йил Украинанинг энг бой одамлар етакчи ўнталигидан охирги ўрин эгаллаган президент Пётр Порошенконинг 2017 йил натижаларига кўра бойлиги 589 млн доллардан 542 млн долларгача камайган ва у жорий рейтингда 11-ўринга тушиб кетган. Бундан 13 апрелда эълон қилинган Украинанинг энг бадавлат одамлари юзталиги дарак бермоқда.

“Фокус” маълумотларига кўра, 2017 йилда украиналик олигархларнинг умумий капитали деярли 2 млрд долларга ўсиб, 27 млрд долларни ташкил қилган. Шу билан бирга рейтингга кирган 18 кишининг бойлиги 2016 йилга нисбатан камайган.

Рейтингнинг энг юқори поғонасини навбатдаги марта Ринат Ахметов эгалламоқда. 2016 йилга нисбатан унинг бойлиги учдан бир қисмга кўпайиб, 3,1 млрд долларни ташкил қилган. Унинг ортидан “Приват” гуруҳи эгаси Игорь Коломойский (1,6 млрд доллар), Геннадий Боголюбов (1,5 млрд доллар), EastOne эгаси Виктор Пинчук (1,4 млрд доллар) келмоқда. Етакчи бешталикни 1 млрд долларлик бойлик билан Константин Жеваго якунламоқда.

Янги рейтингга 12 нафар янги шахс кирган. Энг бой украиналиклар орасида 3 нафар аёл бор: Галина Герега (“Эпицентр” компанияси, рўйхатда 12-ўрин), Наталия Бондарева (“Байядера групп”, 35-ўрин), Филя Жебровская (“Фармак”, 40-ўрин).

Нашрнинг таъкидлашича, ўрта статистик украиналик мультимиллионер 54 ёшда, уйланган ва 259 млн доллар бойликка эга. Рейтингнинг энг ёш вакили Максим Микитас 37 ёшда бўлиб, 129 млн долларга эга (59-ўрин). Энг кекса вакили эса 79 ёшли Вячеслав Богуслаев бўлиб, унинг бойлиги 327 млн долларни ташкил қилган (21-ўрин).