Faceboок, Microsoft ва яна 30 та компания киберҳужумларда иштирок этмасликка ваъда берди   

30 дан кўпроқ технологик компания, жумладан Facebook ва Microsoft бирор давлат ҳукумати ташкиллаштириши мумкин бўлган киберҳужумларда иштирок этишдан воз кечиш ҳақидаги келишувни имзолади.  

Ҳужжатга кўра, компаниялар бир-бирларининг заиф томонлари ва хавфсизликка таҳдид ҳақидаги ахборот билан алмашиш мажжбуриятини ўз зиммаларига оладилар. Келишувни имзолаган компаниялар орасида Cisco, Juniper Networks, Oracle, Nokia, SAP, Dell, Symantec, FireEye ва Trend Micro каби компаниялари ҳам бор. АҚШнинг Amazon, Apple, Alphabet ва Twitter каби технологик компаниялари келишувни имзолашдан бош тортган. Шунингдек, келишувни имзолаган компаниялар орасида Россия, Хитой, Эрон ва Шимолий Кореянинг бирорта компанияси йўқ.         

Microsoft президенти Брэд Смитнинг айтишича, у бир неча йил давомида жамоатчиликка киберҳудудда ўзини тутиш қоидаларини ўрнатадиган концепция яратиш зарурлиги ҳақидаги фикрни етказишга уриниб келган. Айнан Смит 2017 йил Сан-Францискода киберхавфсизлик бўйича ўтган анжуманда технологик компанияларга бундай келишувни тузишни таклиф қилган.

“Ўтган йилги вайронкор киберҳужумлар бутун дунё бўйлаб тизимларга зиён етказди, уларни йўқ қилди ва барбод қилди. Бу ҳужумлар борган сари мураккаблашиб бормоқда ва оддий ҳолга айланмоқда”, деб айтган Смит. Унинг айтишича, технологик компаниялар киберхавфсизлик учун биринчи бўлиб жавобгардирлар.