Қандимдаги мажмуада йилига қанча табиий газ қазиб олиш имкони бор?

Президент Шавкат Мирзиёев Қандим газни қайта ишлаш мажмуасининг ишга туширилишига бағишланган тантанали маросимдаги нутқида у мамлакатнинг жадал ижтимоий-иқтисодий ривожланишига хизмат қилишини таъкидлаб ўтди, деб ёзмоқда “Халқ сўзи”.

— Марказий Осиёдаги энг йирик иншоотлардан бири бўлган корхонамиз замонавий технологик ускуналар билан жиҳозланган, — деди мажмуа директори ўринбосари Исроил Тўраев. — Улар ёрдамида йилига 8 миллиард куб метрдан зиёд табиий газ қазиб олиниб, тозаланган газ, барқарорлаштирилган конденсат ҳамда олтингугурт каби экспортбоп маҳсулотлар тайёрланади. Бизга табиий газ Қандим, Қувачи-Олот, Порсонкўл, Ҳожи каби конлардан етказиб бериляпти. Янги ускуналарнинг яна бир афзаллиги шундаки, иш жараёнида атмосферага умуман газ чиқиб кетмайди. Бу эса ишлаб чиқариш чоғида экологияга зиён етказилмайди, деганидир.

Россиянинг “Лукойл” компанияси билан ҳамкорликда барпо этилган мажмуа “БАСФ”, “Якобс”, “Хоневелл” каби жаҳондаги энг йирик компанияларнинг сўнгги русумдаги технологиялари билан жиҳозланди. Қурилиш-монтаж ишлари эса “Хендай Инжиниринг”, “Поско” ва “Джи-Эс”, “Энтер Инжиниринг” компанияси билан ҳамкорликда амалга оширилди. Бунинг учун Ўзбекистон ҳамда хорижнинг юқори малакали мутахассислари, жами 10 минг нафарга яқин кишилар жалб этилгани туфайли ушбу йирик иншоот кўзда тутилганидан саккиз ой аввал бунёд қилинди. Шу мақсадда 3 миллиард АҚШ долларидан ортиқ инвестиция ўзлаштирилди.