Уоррен Баффет Apple’нинг 2-рақамли энг йирик акциядорига айланди

Дунёнинг энг бой одамларидан бири, америкалик сармоячи Уоррен Баффетнинг компанияси Apple компаниясининг 2-рақамли энг йирик акциядори эканлигини тасдиқлади. Berkshire Hathaway Inc.да айтилишича, компания, шунингдек, IBM’нинг барча акцияларини сотиб юборган.

Компаниянинг маълум қилишича, у Apple’нинг 40 млрд доллардан кўпроқ қийматли 239,6 млнта акциясига эга. Шу тариқа, Баффет айни вақтда Apple’нинг тахминан 5 фоиз акциясига эга. Berkshire Hathaway Inc. бу борада фақатгина Vanguard Group’дан ортда қолмоқда. Vanguard Group компанияси Apple’нинг қанча акциясига эгалиги номаълум.

Шу билан бирга Баффет компанияси 20-аср охирида Apple билан рақобат қилган IBM’нинг барча акцияларидан халос бўлганини маълум қилди. Компания IBM’нинг 314 млн долларлик акциясини сотиб юборган. Шунингдек, Баффет General Motors’даги улушини 2 млрд доллардан 1,8 млрд долларгача камайтирган. 

7 май куни дунёнинг 3-рақамли энг бадавлат одами CNBC телеканалига берган интервьюсида Apple’нинг 100 фоиз акциясига эга бўлишини исташини айтган. Айни вақтда Баффетнинг бойлиги 84 млрд долларга баҳоланмоқда.