Англия – Бельгия. Ютган ютқазадими?

Бугун, 28 июнь куни жаҳон чемпионати «G» гуруҳида ҳам 3-тур ўйинларига якун ясалади. Мазкур гуруҳда деярли ҳамма нарса ҳал бўлиб улгурган. Яъни, Англия ва Бельгия муддатидан аввал кейинги босқичга чиққан. Фақат бугун улар ўзаро баҳсда гуруҳ ғолиби номига аниқлик киритиб беради.

Англия Бельгияга қарши. Эден Азар ва Кевин де Брюйне етакчилигидаги «олтин авлод» Ҳарри Кейн ва Деле Алли етакчилигидаги янги авлодга қарши майдонга чиқади. Бу ўйин том маънода мухлислар учун, гуруҳ масаласини ҳал қилиб улгурган терма жамоалар томошабоп ўйин кўрсатишга ҳаракат қилишлари табиий.

Бу икки терма жамоа учинчи турда эмас, аввалроқ учрашганида янада қизиқроқ бўларди, қолаверса, ҳозирда иккинчи ўринни эгаллаш биринчи ўриндан яхшироқ ғоя бўлиб қолган. Унинг устига бельгияликлар устози Роберто Мартинес таркибда 10та ўзгариш амалга оширишни мўлжаллаган.

Ютган ютқазадими?

Биринчи ўрин иккинчи ўриндан ёмонроқ вазият. Иккинчи турда Англия ҳам, Бельгия ҳам ўз рақибларини йирик ҳисобларда тор-мор этди. Энди терма жамоаларда тенг кўрсаткичлар - 2тадан ғалаба, 6тадан очко, тўплар нисбати икки жамоада ҳам бир хил 8-2. Фақат инглизларда сариқ карточкалар сони биттага кам 3-2. Шу туфайли Англия гуруҳ жадвалида биринчи ўринда жойлашган.

Гап шундаки, биринчи ўрин билан чиқадиган терма жамоа йўлида Бразилия, Аргентина, Франция, Португалия, Уругвай каби терма жамоалар чиқиши мумкин. 2-ўрин соҳиби борадиган йўл эса бироз енгилроқ – Хорватия, Дания, Испания, Швеция... Бундан ташқари, иккинчи ўрин билан чиққан жамоада бир кун ортиқча дам олиш куни бўлади.

Айни вақтда бельгияликлар Роберто Мартинесни биринчи ўрин учун зўр бериб ҳаракат қилмасликка чақиришмоқда. Англияда эса экспертлар ҳам, мухлислар ҳам, журналистлар ҳам жўровоз бўлиб ўз жамоаларидан... иккинчи ўринни эгаллашни сўрашмоқда. Фақат Гарет Саутгейт жамоаси ғалаба учун майдонга чиқишини айтмоқда. Агар ўйинда дуранг ҳисоб қайд этилса, биринчи ўрин тақдирини карточкалар ҳал қилади. Бу ўйинда футболчилар атайлаб карточка ишлашга ҳаракат қилмасликлари тайин.

Бельгия қандай ротациялар қилмоқчи?

Ўйинда Англия премьер-лигасида бир жамоа сафида ўйновчи футболчиларнинг ўзига хос дуэли кузатилиши мумкин. Дайер Фертонгенга қарши, Кэйхилл Азарга қарши, Стоунз Де Брюйнега, Жонс Лукакуга қарши ва ҳоказо. Аммо Калининграддаги стадионда майдонга бу футболчиларнинг ҳаммаси ҳам тушмаслиги мумкин.

Бельгияликлар устози Роберто Мартинес Тунис устидан қозонилган ғалабадан кейин учинчи турда бир қатор етакчи футболчиларга дам бермоқчи эканини айтиб ўтганди. Масалан, Фертонген, Менье ва Де Брюйне. Сабаби бу футболчиларнинг сариқ карточкалари ҳам бор. Компани эса жароҳатдан ҳали тузалгани йўқ, шунингдек, Мертенс, Эден Азарда кичик жароҳатлар бор, Лукаку эса жароҳат туфайли охирги машғулотларда қатнашмади. Шундай экан, бошланғич таркибда Батшуайи. Дембеле, Дендонкер, Янузай, Торган Азар каби футболчиларни кўришимиз мумкин.

Гарет Саутгейт режаларини олдиндан ошкор этмаган, аммо у ҳам ўзгаришлар қилиши кутилмоқда. Аммо у тўпурар бўлишни истаётган Кейнни майдонга туширади, Тунисга қарши биринчи тур учрашувида жароҳат олиб, Панамага қарши ўйинни ўтказиб юборган Алли ҳам ўйинга тайёр. У охирги машғулотларда умумий гуруҳ билан шуғулланган.

Аввалги ўйинларда нималар бўлганди?

Англия
• Тунис Ҳаррининг дубли эвазига мағлуб этилди (2:1), Панама дарвозаси эса ушбу футболчи томонидан уч бор ишғол этилди (6:1).
• Тунисга қарши кечган ўйинда инглизлар жаҳон чемпионатларида илк марта қўшимча дақиқаларда ғалаба голини уришди.
• 6:1 – Англия термасининг жаҳон чемпионатларидаги энг йирик ғалабаси.
• Англия бурчак жарималаридан кейин 3 марта гол урди – бу энг яхши натижа.
• Кейн дарвоза томон 4 марта зарба бериб, 5 гол урди. Ҳарри Лофтус-Чикнинг зарбаси йўлидан чиқиб қолиб (Кейннинг Панамага учинчи голи) математик қонуниятларни «бузди».

Бельгия
• Панама – 3:0, Тунис – 5:2 ҳисобларида мағлуб этилди.
• Тунисларнинг мағлуб этилиши – Бельгиянинг жаҳон чемпионатлари тарихидаги энг йирик ғалабаси бўлди.
• Дастлабки икки турда 8 гол –  бу ЖЧ-2018 турнирида 29 терма жамоа натижасидан яхши (фақат Россия ва Англия ҳам шунчадан гол урган).
• Тунис билан ўйинда дубль қайд этган Ромелу Лукаку ўз номини тарихга ёзди: шу вақтга қадар жаҳон чемпионатларида ҳеч қайси бельгиялик 7 гол уришга эришмаганди.