Японияда хусусий ракета учирилиши биланоқ портлаб кетди

Японияда Interstellar Technologies Inc. венчур компаниясига тегишли хусусий ракетани учиришга иккинчи уриниш ҳам муваффақиятсизлик билан тугади: ракета учирилгандан бир неча сония ўтиб портлаб кетган. 

Узунлиги 10 метрни ташкил қилувчи МОМО ракетаси компаниянинг уни Япония аэрокосмик агентлиги (JAXA) ёрдамисиз фазога учиришга иккинчи уриниши бўлиши керак эди.   

Биринчи уриниш 2017 йил 30 июлда бўлиб ўтган. Узунлиги 10 метр ва оғирлиги 1 тонна бўлган МОМО-1 ракетаси JAXA эмас, балки венчур компания томонидан яратилиб, учириладиган биринчи ракета бўлиши керак эди. Ракета Хоккайдо оролидан учирилган. Бироқ бироз вақтдан кейин ракетадан ахборот келмай қолган ва унинг двигатели фавқулодда тартибда ўчирилган. Ракета 20 км баландликка кўтарилган ва учирилган жойидан 6,5 км узоқликда Тинч океанига тушган.

Иккинчи уриниш ҳам муваффақиятсиз тугади. Ракета 600 метр узоқликдан масофадан бошқарилгани сабабли ҳеч ким жабрланмаган. Томошабинларга ташриф учун тақиқланган ҳудуд 1,5 кмни ташкил қилган. Компания юз берган воқеа сабабларини аниқлаштирмоқда.