Баклашкалар билан нишонга олинган «Нефтчи» футболчиси мухлислардан узр сўради

Суперлига 20-туридан ўрин олган «Нефтчи» – «Навбаҳор» (2:1) ўйинининг 68-дақиқасида мезбонлар футболчиси Абдураҳмон Абдулҳақов гол урганидан сўнг, «Навбаҳор» клуби мухлислари ўтирган сектор олдида голни нишонлаган ва нолойиқ ҳатти-ҳаракатларни қилган эди. Шундан сўнг, футболчи «Навбаҳор» мухлислари томонидан отилган баклашкалар нишонига айланди.

Натижада ПФЛ интизом қўмитаси мусобақалар регламентининг интизомий ва жарималар кодекси 1-қисми 5.4 бандини бузгани учун «Нефтчи» футболчиси Абдураҳмон Абдулҳақов 2 миллион сўм миқдорида жаримага тортди.

Футболчи ўз қилган ишидан афсусда эканлигини таъкидлаб, «Навбаҳор» мухлисларидан узр сўради: 

«Ўйин вақтида футболчи кучли ҳис-хаяжонлар оғушида бўлади. Айниқса гол урилган вақтда ўз ҳис-ҳаяжонларини жиловлаш бироз қийин кечади. Дербида жамоамиз учун муҳим бўлган голни урганимдан сўнг, мана шундай ҳис-ҳаяжонга берилиб, беихтиёр рақиб мухлислари томон югурдим. Бу эса нотўғри қарор эди. Шу сабаб «Навбаҳор» жамоаси мухлисларидан бу ишим учун узр сўрайман», - деди Абдулҳақов. 

Эслатиб ўтамиз, «Навбаҳор» футбол клуби ҳам мухлисларининг ҳулқи ва маданияти борасида тегишли тартибда иш олиб бормагани учун охирги марта огоҳлантирилган эди.