Саудия Арабистони Қатар билан ҳамкорлик қилишдан бош тортишини тасдиқлади

БМТ Бош ассамблеяси майдонларида Саудия Арабистони ташқи ишлар вазири Одил ал-Жубайр қиролликнинг Қатар билан бирор-бир иш олиб боришни истамаётганини тасдиқлади. Қатарга 2017 йилда террорчиликни қўллаб-қувватлаш айблови билан блокада эълон қилинганди.  

Ал-Жубайр халқаро муносабатлар кенгаши йиғилишида ўнлаб йиллардан бери террорчилик гуруҳлари етакчиларини ўзида қабул қилаётган Қатарнинг ўзини тутишини номақбул деб атаган.

Жумладан, вазир “Ал-Қоида” етакчиларидан бири Саудия Арабистонига Қатар паспорти билан кирганини эслаб ўтган.

“Бу муносабатларнинг таранглиги эмас, биз шунчаки улар билан бирор-бир алоқага эга бўлишни истамаяпмиз. Қатар 1990-йилларнинг ўрталаридан террорчи ва экстремистларни қўллаб-қувватлаб келади, уларнинг етакчиларини қабул қилиб, уларга терактларини оқлаш учун телевидение орқали мурожаат қилиш имконини беради, бу эса номақбулдир”, деб айтган ал-Жубайр.

Унинг айтишича, Қатар Форс кўрфазида муаммолар юзага келтириш ва вазиятни барқарорсизлаштириш мақсадида араб давлатларида террорчилик гуруҳларини қўллаб-қувватлаб келади.