Қашқадарёнинг Китоб туманида газ портлаши оқибатида 2 нафар ёш бола ҳалок бўлди

Қашқадарё вилояти Фавқулодда вазиятлар бошқармасидан олинган маълумотга асосан, жорий йилнинг 8 октябр куни соат 10:04ларда Китоб тумани, “Истиқлол” МФЙ, Қашқадарё кўчаси, 38-уйнинг (уй эгаси 1947 й.т. А.Пармонов) ошхонасида газ плитасининг носозлиги сабабли ҳаво-газ аралашмасининг чақнаши содир бўлган.

Чақнаш оқибатида ошхона шифтининг 4 квадрат метр майдони ёнган. Ёнғин оқибатида 2 нафар фуқаро жароҳат олиб, касалхонада вафот этган, бир нафар фуқаро куйиш тан жароҳатлари билан Китоб тумани тиббиёт бирлашмасининг шошилинч тиббий ёрдам бўлимига ётқизилган.

Уй эгасининг набиралари 5 ёшли Беллура Хомидова (2013 й.т., танаси 100 фоиз куйган) ва 
2 ёшли Фарзона Хомидова (2016 й.т. 100 фоиз куйган) ҳалок бўлган.

Уй эгасининг келини Бахтигул Жамолова (1991 й.т., танасининг 40-45 фоизи куйган) ўрта оғирликда жароҳат олган.

Воқеа юзасидан тергов ишлари олиб борилмоқда.