Америкалик машҳур яккакурашчи Хабиб Нурмагомедовни қўллаб-қувватлади 

Америкалик машҳур яккакурашчи Чак Лидделл россиялик Хабиб Нурмагомедовни Мутлақ жангчилик чемпионати UFC’га қўйган шарти масаласида қўллаб-қувватлади. Аввалроқ Нурмагомедов UFC унинг Конор Макгрегорга қарши жангидан кейин юзага келган можарога аралашган Зубайра Тухуговни ташкилотдан четлатгани ва Артём Лобовга қарши жангини бекор қилганидан аччиқ билдирганди. Жанг 27 октябрда ўтиши керак эди. 

7 октябрда ўтган жанг тугаши билан Нурмагомедов октагондан чиқиб кетиб, Макгрегорнинг спарринг-шериги Диллон Дэвис билан муштлашиб кетган. Бу орада UFC’нинг бошқа жангчиси Зубайра Тухугов октагонга чиқиб, Макгрегор билан уришиб кетган. Шундан кейин UFC раҳбари Дана Уайт октагонга югуриб чиққан жангчилар ташкилотдан четлатилишини айтган.

“Хабиб Нурмагомедов учун пул муҳим эмас, гап принцип ҳақида кетмоқда. Бу телбаликдек туюлиши мумкин, бироқ ҳаётда муҳокама қилинмайдиган нарсалар бор. Мен унинг хатти-ҳаракатларини оқламайман (таниқли жангчи ва кўпчиликка ўрнак сифатида, бўлиб ўтган воқеага қаршиман). Мен спортимиз одамлар дастлаб ўйлаган ваҳшиёна усулларга айланишини истамайман, бироқ мен биз, жангчилар, юқорироқ стандартларга амал қилишимиз ва одамларга ҳурмат билан қарашимиз кераклигига қўшиламан. Мен кўчада уришишни бошлаганман, бироқ кўчада ҳам биламизки, тегиш мумкин бўлмаган нарсалар бор. Сен оила, дин ёки миллат ҳақида гапирганингда, олов билан ўйнашасан. Бу нарсалар муқаддасдир. Мен ҳеч қачон бундай қилмайман. Бу мен учун қоидадир.

Агар Хабиб ёки унинг жамоаси Конордан фарқли равишда жазоланса, жуда адолатсиз бўлади. Агар Хабиб жазоланса, унда Конорга ҳам жарима солиш ва дисквалификация солиниши керак. Худди шу нарса уларнинг кармонига ҳам таъсир қилиши лозим.

Нима учун Зубайра жанги бекор қилиниши керак? У ҳар қандай ҳақиқий жангчи сифатида оғасини ҳимоя қилди. Конор унга кимдир ҳужум қилишидан олдин камида иккита зарба берди. Нима учун барчаси бунчалик нотўғри? Пуллар бизни кўр қилмоқдами? Бу йигитлар жангчилар ва уларнинг иши шу. UFC барча чегараларни ювиб юборди. Ташкилот рейтинг ва яхши пул тўланувчи кунлар учун сотилмоқда. Баъзи жангчиларда хоҳлаган ишини қилиш ва шу билан бирга жарималардан қочишга имтиёз бор. Биз, жангчилар “чизиқни кесиб ўтишинг билан” барча ставкалар бекор қилинишини биламиз. Менга айтишга ижозат бергайсиз: UFC назоратни қайтариши лозим”, деб ёзган Лиделл инстаграмда.