“Ўзсаноатқурилишбанк” АТБ “Газпромбанк” билан ҳамкорликни янада кенгайтиради 

Ўзбекистон Республикасида тадбиркорлик ташаббусларини қўллаб-қувватлаш, йирик инвестиция лойиҳалари ва кичик бизнес лойиҳаларини молиялаштириш имкониятларини кенгайтириш, шунингдек, банкни стратегик ривожлантириш жараёнларини муваффақиятли амалга ошириш мақсадида “Ўзсаноатқурилишбанк” АТБ Россиянинг йирик молиявий институтлари билан ҳамкорлик алоқаларини кенгайтирмоқда. 

Ўзбекистон Республикаси Президенти Шавкат Мирзиёевнинг таклифига биноан Россия Федерацияси Президенти Владимир Путиннинг мамлакатимизга давлат ташрифи доирасида “Ўзсаноатқурилишбанк” АТБ ва “Газпромбанк” АЖ ўртасида 50 миллион доллар миқдорида ўзаро ҳамкорлик тўғрисидаги келишув имзоланди. 

Мазкур ҳужжат Россия Федерациясининг етакчи молия муассасаларидан бири ҳисобланган “Газпромбанк” билан “Ўзсаноатқурилишбанк” ўртасида кўп томонлама ҳамкорлик муносабатларининг ўрнатилишига хизмат қилиши билан аҳамиятлидир. 

Келишувда углеводородларни қазиб олиш, қайта ишлаш ва ташиш, тоғ-кон ва металлургия саноати, транспорт, қишлоқ хўжалиги, тўқимачилик саноати, қурилиш ва атом энергетикаси сингари муҳим аҳамиятга эга соҳалардаги лойиҳаларни молиялаштириш ва инвестициявий кредитлаш белгиланди. 

Ҳужжатда мамлакатимизда жадал ривожланаётган йўналишлардан яна бири бўлган давлат-хусусий шерикчилик соҳасини молиялаштиришга ҳам алоҳида эътибор қаратилган.

Жумладан, соғлиқни сақлаш, уй-жой коммунал ва ижтимоий инфратузилмаларни молиялаштириш янада кенгайтирилади. 

Келишув доирасида, шунингдек, қимматли қоғозлар ва қарз капитали бозорларида операцияларни амалга ошириш бўйича ҳамкорлик қилинади. Бу борада “Ўзсаноатқурилишбанк” облигацияларини нафақат Россия Федерацияси ҳудудида, балки бошқа хорижий мамлакатларда ҳам чиқарилиши белгиланганини алоҳида қайд этиш жоиз. 

“Газпромбанк” билан банк ходимлари малакасини оширишга қаратилган семинар-тренинглар ҳам ўтказилиши назарда тутилган бўлиб, бу “Ўзсаноатқурилишбанк” томонидан амалга оширилаётган трансформация жараёнларини янада жадаллаштириш имконини беради.  

Таъкидлаш  керакки, Келишув доирасида Ўзбекистон Республикасида Атом электр станциясини қуриш лойиҳасини молиявий қўллаб-қувватлаш бўйича йўналишлар белгилаб олинди.