Индонезиядаги авиаҳалокат қурбонининг қаллиғи унинг “охирги истаги”ни бажо келтирди

Индонезиядаги авиаҳалокатда ҳалок бўлган йигитнинг қаллиғи ёлғиз ҳолда тўй фотосессиясини уюштириб, унинг “охирги истаги”ни бажо келтирди.

Интан Шяри исмли қиз ва Рио Нанда Пратама исмли йигит бир-бирларини 13 йилдан бери танишган ва 11 ноябрда никоҳ тўйи ўтказишмоқчи бўлишган. 

Йигит шифокор бўлган ва тўйгача уйига қайтишни режалаштирган ҳолда Жакартадаги семинарга кетган. Бироқ бахтсиз рейс у учун сўнггиси бўлди ва жудоликдан қайғураётган  қиз ёрининг охирги истагини бажо келтирди.

Қизнинг айтишича, Рио самолётга ўтириши олдидан ҳазиллашиб, агар тўйгача келишга улгурмаса, тўйда суратга тушиб, уларни унга юборишини айтган.

Қиз инстаграмдаги саҳифасида ҳалок бўлган қаллиғи биринчи муҳаббати ва у билан 13 йилдан бери таниш бўлганини тан олган. Қиз келин либосида бир ўзи тушган суратга изоҳда ёрига мусибат унинг қаддини букмаслиги ва у учун табассум қилишга ваъда қилганини айтган.

“Мен қайғура олмайман ва доимо сен айтганингдек, кучли бўлишим керак”, деб ёзган қиз.

Ноодатий фотосессияга таклиф қилинган фотосуратчи интернетда унда олинган бир неча суратни эълон қилган ва севишганларнинг фожиали қисмати билан бўлишган.

Самолёт 29 октябрда Ява ороли яқинида қулаган. Самолёт бортида 189 киши бўлган. Самолёт билан алоқа Жакарта аэропортидан ҳавога кўтарилгандан 13 дақиқа ўтиб йўқолган. Шундан кейин самолёт денгизга қулаб, чўкиб кетган.

Рионинг шахси 6 ноябрда ўрнатилган, у 2 кун ўтгач дафн этилган.