Александр Зверев ATP’нинг якунловчи мусобақаси финалида Жоковични мағлуб этди

Германиялик теннисчи Александр Зверев ATP’нинг якунловчи мусобақаси финалида дунёнинг биринчи рақамли теннисчиси Новак Жоковични мағлуб этиб, мусобақа ғолибига айланди.

Лондонда ўтган мусобақанинг финал баҳси 1 соат 21 дадқиқа давом этиб, 6:4, 6:3 ҳисобида якунланган.

Эътиборлиси, иккала теннисчи мусобақанинг гуруҳ босқичида учрашишганди ва ўшанда ғалабани сербиялик нишонлаганди.

Зверевнинг ушбу ғалабаси ATP’нинг якунловчи мусобақасида Германия вакиллари учун 1995 йилдан кейин биринчиси бўлди. Охирги марта бунга 23 йил аввал афсонавий Борис Беккер эришган.

ATP рейтингида 5-ўринни эгаллаётган, собиқ иттифоқ теннисчиси Александр Зверевнинг ўғли АТР’нинг якунловчи мусобақасида иккинчи марта иштирок этди. У 2017 йилда гуруҳдан чиқа олмаганди. Теннисчи “Катта дубулға” сериясига кирувчи мусобақаларнинг чоракфиналидан у ёғига ўта олмаган. Теннисчи ўзининг илк совринини 2016 йилда Санкт-Петербургдаги мусобақада қўлга киритган. Зверев, шунингдек, Вашингтон, Мадрид ва Мюнхендаги мусобақаларда ғолибликни нишонлаган.