Арвеладзе: «Бугун «Пахтакор» номи учун майдонга чиқдик»

Суперлиганинг 32-туридаги «Пахтакор»–«Бунёдкор» ўйинидан сўнг (4:0) мезбонлар бош мураббийи Шота Арвеладзе «қалдирғочлар»га қарши ўйиннинг принципиал аҳамияти ҳақида тўхталиб ўтди. Бу ҳақда Tribuna.uz мухбири хабар бермоқда.

«Ўйин ҳақида фикрларимга тўхталишдан олдин, «Локомотив»ни яна бир марта табриклашни истардим. Улар бугун Наманганда «Навбаҳор»ни мағлуб этишди. Бу жамоа билан уч кун олдинги ўйинимизни шараф учун кечган баҳс деб бўлмасди. Бизда имконият бор эди ва биз ана шу имкон учун ўйнагандик. Бугун эса «Пахтакор» номи учун майдонга чиқдик.

Футболчилар яхши ўйин кўрсатишди, кўплаб вазиятлар бўлди ва учинчи ўрин учун курашган «Бунёдкор» устидан ҳақли равишда ғалабага эришдик. 

12 февралда Осиё Чемпионлар лигасига ўтиш ўйинида қатнашамиз. Насиб этса, 19 февралда иккинчи учрашув бўлади. Биринчи рақибимиз – Ироқнинг «Ал-Қува Ал-Жавия» охирги уч йилдан буён кетма-кет ОФК Кубогида ғалаба қозониб келяпти. Шундай экан, олдинда бизни жуда жиддий рақиб кутмоқда.

24 декабрдан йиғин бошлаймиз ва унда формага кириш учун асосан гимнастика машқлари бўлади. Тахминан 14 футболчимиз терма жамоаларда бўлишади. Насиб қилсин – терма жамоамиз охиригача етиб борсин-у, биз уларни декабрда ҳам, январь охирида ҳам сафимизда кўрмайлик», - дея қайд этиб ўтди Арвеладзе.