Трамп АҚШ собиқ давлат котиби Рекс Тиллерсонни анқов ва дангаса деб атади

АҚШ президенти Дональд Трамп твиттердаги саҳифасида собиқ давлат котиби Рекс Тиллерсонни анқов ва дангаса деб атади.

«[Давлат котиби] Майк Помпео ўз ишини яхши қилмоқда, мен ундан жуда фахрланаман. Ундан аввалги Рекс Тиллерсонда керакли ақлий қобилиятлар йўқ эди. У анқов эди ҳамда мен ундан тезда қутула олмадим. У жуда дангаса одам эди», - дея ёзган Трамп.

АҚШ президенти Тиллерсон омма олдидаги нутқида уни «ҳисоботларни ўқишни ёқтирмайдиган ва тафсилотларни ўрганишни хоҳламайдиган, жуда бетартиб шахс», деб атаганидан сўнг шундай баёнот берди, деб ёзмоқда BBC News.

ExxonMobil нефть компаниясини бошқарган Рекс Тиллерсон Дональд Трампнинг таклифи билан АҚШ Давлат департаментига раҳбар бўлганди. Трамп у ҳақида ижобий фикрлар билдириб, «ишбилармондан кўра каттароқ шахс» ва «жаҳон даражасидаги ўйинчи», деб атаган. Кейинчалик уларнинг можаролари ҳақида миш-мишлар тарқалди; 2018 йил март ойида президент Тиллерсонни ишдан бўшатди.

Эслатиб ўтамиз, аввалроқ Трамп Обама ва унинг рафиқаси билан сўрашиб, Клинтонлар оиласига эътибор ҳам бермагани хабар қилинганди.