Қайси футбол клубининг расмий сайтига жаҳон бўйлаб энг кўп одам кириши маълум бўлди

«Реал» президенти Флорентино Перес кеча Рождество арафасида оммавий ахборот воситалари ходимлари билан байрам тушлиги уюштирди ва унда нутқ сўзлади.

Перес ўз табригида клубнинг сўнгги уч мавсумдан буён кетма-кет равишда ЕЧЛда ғолиб чиқаётгани, охирги 5 йил ичида эса 4 марта бош совринни қўлга киритганига алоҳида урғу берган. У, шунингдек, жамоа аъзоси Лука Модрич «Олтин тўп» совринини қўлга киритганига тўхталиб ўтган.

Қолаверса, 71 ёшли раҳбар шу йил «Реал» ўз тарихида илк марта ҳам футбол, ҳам баскетбол бўйича Европада тенгсиз клуб бўлганини қайд этиб ўтди.

«Клубимиз Испанияда [футбол жамоалари ичида] биринчи бўлиб мамлакат миқёсида бепул кўриш мумкин бўлган ва HD сифатга эга телевизион канал фаолиятини йўлга қўйди. Realmadrid.com – футбол клублари орасида жаҳонда энг кўп ташрифчига эга расмий сайт бўлиб турибди», - деб айтди Перес.

Клуб президентининг қўшимча қилишича, «Реал»нинг ижтимоий тармоқлардаги саҳифаларини кузатувчилар сони 312 млн нафардан ошади.