Андининг Ўзбекистондаги телеканаллардан бирида айтган сўзлари тушунарсиз ҳолатни келтириб чиқарди

Асли келиб чиқиши арманистонлик бўлган эронлик ва америкалик хонанда Анди ўзбек телевидениеси каналларидан бирига интервью берди.

Телекўрсатув бошловчиси шундай савол берган: «Сиз Ўзбекистонга неча марта ташриф буюргансиз?». Хонанда инглиз тилида жавоб қайтарди: «I think this is the 3rd time I’m coming to Uzbekistan, maybe 4th time, because I came here 24 years ago» (таржима – Менинг ўйлашимча, Ўзбекистонга учинчи марта келяпман, балки тўртинчисидир, сабаби мен бу ерга 24 йил муқаддам келганман).

Телеканал таржимони қўшиқчининг сўзларини бошқача тарзда тақдим этишга қарор қилди ва шундай таржима қилди: «Мен Ўзбекистонда тўртинчи мартаман ва жуда хурсандман. Менга Ўзбекистон ёқади».

Шу тариқа, таржимон асосий нарсага эътибор қаратди - «хонандага бу ерда ҳамма нарса ёқди».

Эслатиб ўтамиз, аввалроқ «Ўзбекистон 24» телеканали мухбири Мавжуда Мирзаева Kun.uz’га телеканал фаолияти ҳақида ўз шахсий фикрини билдирганди.

Интервью давомида у журналистлар томошабинни баъзида алдаши ҳақида айтди

«Касб тақозосига кўра кўплаб хорижий инвесторлар билан интервьюлар тайёрлаймиз. Аммо улар айтган гаплари кескин ўзгартириб юборилади. Масалан, хорижлик меҳмон ўзининг Ўзбекистондаги фаолиятида дуч келаётган муаммолар ҳақида гапирса, уларнинг ечимини кутаётганини айтса, биз таржимада «Ўзбекистондаги улкан ислоҳотлардан ҳайратдаман...» мазмунида ўқиб юборамиз. Ахир бу томошабинни, ўз халқимизни алдаш эмасми?! Одамлар билмайди, деб ўйлаймиз. Аммо бугуннинг одамлари ҳамма нарсадан бохабар. Улар интернетни, бошқа ахборот манбаларини кузатиб боришади. Бизнинг ёлғонларимизни кўриб-билиб туришади ва устимиздан кулишади», - деди мухбир.