Қамчиқ довони ҳаракатланиш хавфсизлигини таъминлаш мақсадида вақтинча ёпилди

Ўзбекистоннинг бошқа минтақаларини Фарғона водийси билан Қамчиқ довони орқали боғловчи ягона йўли номаълум муддатга ёпилди. Бундан кўзланган мақсад, Қамчиқ довонида ҳаракатланиш ҳамда фуқаролар хавфсизлигини таъминлашдир. Фавқулодда вазиятлар вазирлигининг Kun.uz’га маълум қилишича, «Ўзгидромет»нинг об-ҳавога доир тақдим этган маълумотномасидан кейин шундай қарорга келинган. 

Вазирлик ходимининг билдиришича, айни вақтда йўлларни тозалаш ишлари олиб борилмоқда. Шу билан бирга, автомобиль йўлининг қачон очилиши ҳам ҳозирча номаълум.