Қўшилган қиймат солиғидан озод этиладиган озиқ-овқат маҳсулотлари рўйхатига сут ҳам киритилди 

Вазирлар Маҳкамасининг “Ўзбекистон Республикасида ишлаб чиқариладиган реализация қилиш оборотлари қўшилган қиймат солиғидан озод этиладиган озиқ-овқат маҳсулотлари рўйхатига қўшимча киритиш тўғрисида”ги қарори қабул қилинди.

Ушбу қарорга мувофиқ, сут Ўзбекистонда ишлаб чиқариладиган реализация қилиш оборотлари қўшилган қиймат солиғидан озод этиладиган озиқ-овқат маҳсулотлари рўйхатига киритилди. 

Қайд этилишича, мазкур қарор сут саноатини ривожлантириш учун қўшимча шарт-шароитлар яратиш ҳамда сутни қайта ишлаш корхоналарининг фермер хўжаликлари билан кооперациясини кучайтириш мақсадида қабул қилинган.

Эслатиб ўтамиз, мазкур рўйхатдан 9 турдаги маҳсулот гўшт (мол, қўй, товуқ гўшти), шунингдек ҳайвонлар (қорамол ва парранда) тирик ҳамда уларнинг сўйилган маҳсулотлари, балиқ, картошка, пиёз, тухум, гуруч, шакар, нон ўрин олган эди.