Осиё Кубоги. Хитой ярим финалга чиқа олмади, Марчелло Липпи истеъфога чиқди

Италиялик мутахассис Марчелло Липпи Осиё Кубоги чоракфиналидан ўрин олган Эронга (0:3) қарши ўйиндан сўнг, лавозимини тарк этишини айтди.

«Бу ўйиндан кейин Хитой терма жамоаси билан имзолаган шартномам муддати ниҳоясига етди. Мен бор кучимни сарфлаб ишладим, терма жамоа анча кучайди. Барчага ўз миннатдорчилигимни билдираман.

Эронга қарши ўйинда 2та голни ўзимиз совға қилдик. Бу ўйинда хато қилмаслигимиз лозим эди. Чунки бу рақибга гол уриш жуда мушкул. Бу оғир ўйин бўлиши мумкин, аммо бундай ҳисобда ютқазмаслигимиз шарт эди. Менимча, биз Осиё Кубогида яхши натижага эришдик, барча футболчиларга миннатдорчилик билдираман», - деди Липпи матбуот анжуманида.

Италиялик мутахассис Хитой терма жамоасида 2016 йилдан буён ишлаб келаётганди. Липпи Италия терма жамоаси билан 2006 йилда жаҳон чемпиони бўлган, «Ювентус» билан Италия чемпионатида ва Чемпионлар лигасида ғолиб чиққан. Липпи Италия термасида қаторасига мағлубиятсиз ўйинлар серияси қайд этиб (31 ўйин) рекорд ўрнатган.

Осиё Кубоги доирасида бунгача икки мураббий лавозимини тарк этганди. A гуруҳида иштирок этган Таиланд терма жамоаси биринчи турда Ҳиндистон терма жамоасидан учралган йирик ҳисобдаги мағлубиятдан (1:4) кейин бош мураббий Милован Раевацни истеъфога чиқарди. Таиландликлар кейинги икки ўйинда керакли натижа кўрсатиб, нимчорак финалга йўл олди.

Саудия Арабистонини чорак финалга олиб чиқолмаган мураббий Хуан Антонио Пицци ҳам нимчорак финалда Японияга қарши кечган ва 0:1 ҳисобидаги мағлубият қайд этилган ўйиндан кейин истеъфо берди.