Мадуро АҚШнинг Венесуэлага ҳарбий интервенциясига қарши имзолар тўпланишини эълон қилди  

Венесуэла президенти Николас Мадуро 6 февралдан АҚШнинг Венесуэлага ҳарбий интервенциясига қарши имзолар тўпланиши бошланишини эълон қилди. Мадуро бу ҳақда 4 февралда Арагуа штатидаги ҳарбий парадда айтиб ўтган. 

“Мен Венесуэла халқини АҚШ ҳукумати томонидан ҳарбий куч қўлланиши таҳдидига биргаликда қарши чиқишга чақираман. Келаётган чоршанбадан мамлакат бўйлаб бу таҳдидларга қарши Оқ уйга топшириладиган имзолар тўпланиши бошланади. Мен Венесуэла халқини бу ҳужжатни имзолашга чақираман”, деб айтган Мадуро.

Венесуэла президентининг айтишича, имзолар тўпланиши “ҳар бир майдонда, казармада, мактабда, фабрикада” ўтиши керак. “Биз Америка интервенциясини истамаймиз, биз тинчлик, тинчлик ва мустақиллик, тинчлик ва қадр-қиммат, тинчлик ва миллий суверенитет, тинчлик ва озодликка асосланган демократияни истаймиз”, деб қўшимча қилган Мадуро.

3 февралда АҚШ президенти Дональд Трамп ҳозирда сиёсий инқироз давом этаётган Венесуэлада АҚШ кучлари қўлланиши мумкинлигини истисно қилмаслигини айтган.