ЎФА Кубоги. Тошкент шаҳри ва Қашқадарё вилояти ўртасидаги финал ўйинидан фоторепортаж

Бугун, 12 февраль куни Тошкентдаги «Ўзбекистон» спорт саройида умумий ўрта таълим мактаблари ўқувчилари ўртасида футзал бўйича ЎФА Кубогининг ҳал қилувчи учрашувлари бўлиб ўтди. Мусобақа Ўзбекистон футбол ассоциацияси ҳамда Халқ таълими вазирлиги томонидан улар ўртасида имзоланган меморандумга асосан ташкил этилди, деб хабар беради Kun.uz мухбири.

Турнир 5 босқичдан иборат бўлди, бугунга қадар ўтказилган тўртта босқичда республика бўйлаб жами 130 мингдан ортиқ мактаб ўқувчилари қамраб олинганди. Пойтахтда ўтган финал раундига мезбон Тошкент шаҳри, шунингдек, Наманган, Навоий ва Қашқадарё вилоятлари жамоалари етиб келишди.

Ярим финалдан муваффақиятли ўтган Тошкент шаҳри ва Қашқадарё вилояти жамоалари финалда рўбарў келишди. Биринчи бўлим мезбонлар устунлигида ўтган бўлса, иккинчи таймда қашқадарёликлар ташаббусни ўз қўлларига олишди. Ва бу тенглик ҳисобда ҳам ўз аксини топди – 4:4. Бош соврин ғолибига пенальтилар серияси аниқлик киритди, унда омадлироқ чиққан Тошкент шаҳри жамоаси чемпионликни қўлга киритди.

Тақдирлаш маросимида ЎФА ва Халқ таълими вазирлиги мутасаддилари иштирок этишди. Бронза медали соҳиблари – Наманган ва Навоий вилоятлари жамоалари планшет ва рюкзаклар билан тақдирланган бўлса, иккинчи ўринни олган Қашқадарё жамоасига велосипедлар топширилди. Чемпион Тошкент шаҳри жамоаси аъзоларига «PlayStation4» ўйин қурилмалари совға қилинди. Шунингдек, турнирнинг энг яхши футболчиси, тўпурари ва дарвозабони ҳам алоҳида мукофот билан тақдирланди.