Майкл Блумберг Трампга қарши курашга 500 млн доллар ажратишни режалаштирмоқда – ОАВ 

Нью-Йоркнинг собиқ мэри, америкалик миллиардер Майкл Блумберг АҚШ президенти Дональд Трампнинг иккинчи президентлик муддатга сайланишига йўл қўймаслик учун камида 500 млн доллар сарфламоқчи. 

Ҳозирча миллиардер 2020 йилги сайловларда ўзи иштирок этиши ёки бошқа номзоднинг кампаниясини молиялаштириши номаълум. Бу ҳақда номи маълум қилинмаган демократларга иқтибос келтирган ҳолда Politico нашри хабар берди. 

Блумберг ўз вақтида Нью-Йорк мэри лавозими учун сайловларга 100 млн доллар сарфлаган.

Таъкидланишича, 500 млн доллар сарф-харажатларнинг бошланиши бўлиши мумкин – бу маблағлар партия праймеризларидан ўтиш учун сарфланади. Бу қиймат Блумберг бойлигининг 1 фоизинигина ташкил қилади.

2018 йил ноябридан бери Блумбергга “А режа” ва “Б режа”ни тузаётган политтехнологлар жамоаси ишламоқда.

Биринчи режага кўра, миллиардернинг ўзи Демократик партия номидан сайловларда иштирок этади.

Иккинчи режа эса Блумберг демократлар томонидан илгари сурилган номзодга “Трамп президентлигига барҳам бериш” учун ёрдам беришини кўзда тутади.

Блумберг Нью-Йорк мэри лавозимини 2001 йилда эгаллаган ва кейинчалик бу лавозимга икки марта қайта сайланган.

Миллиардер дастлаб Республикачилар партияси аъзоси бўлган. Бироқ 2018 йилда у Демократик партия сафига қўшилишга қарор қилган.