Венесуэла гуманитар юк орасида баррикадалар яратиш учун анжомлар бўлганини маълум қилди 

Венесуэла ва Колумбия чегарасида 23 февралда ёқиб юборилган гуманитар юк ортилган юк машиналарида нафақат озиқ-овқат ва дори-дармон, балки баррикадалар яратиш учун анжомлар бўлган. Бу ҳақда Венесуэла ташқи ишлар вазири Хорхе Арреаса БМТ Хавфсизлик кенгашидаги нутқида айтиб ўтди.

23 февралда мухолифат Венесуэлага гуманитар юкни етказишга уринган. Бироқ Колумбия билан чегарада у ердан келаётган бир нечта юк машинаси ёқиб юборилган.   

Арреасанинг айтишича, юк машиналар Молотов коктейли ёрдамида Колумбия томонида бўлганлар томондан ёқиб юборилган.

“Биласизми нима? Юк машина кўздан кечирилганда, унда нафақат озиқ-овқат ва дори-дармон, балки радикал мухолифат қўллашга одатланган, бариккадалар ҳосил қилиш учун анжомлар, сим, тўсиқлар, михлар топилган”, деб айтган вазир.

Венесуэла вакилининг таъкидлашича, мамлакат қуролли кучлари қурол қўлламаган, у фақат кўзни ёшлатувчи газ қўллаган.

Арреасанинг айтишича, чегарада яраланганларнинг кўпчилиги хавфсизлик хизмати ходимлари, аскарлар ва полициячилардир.

Шунингдек, Венесуэла президенти Николас Мадуро Колумбия ва мухолифатни 23 февралда чегарада ҳаракат қилган махсус тўдаларни ташкил этишда айблади.  

“23 февралда чегарага ҳужум қилиш учун колумбиялик жиноятчилар, қуролли тузилмалар ва венесуэлалик жиноятчилардан тўдалар ташкил этилди. Бироқ улар чегарадан ўта олмадилар ва ўта олмайдилар ҳам. Венесуэладан қўлингизни тортинг, суверенитетимиз ва ҳудудимиз ҳурмат қилинишини талаб қиламиз”, деб айтган Мадуро. 

Унинг таъкидлашича, Колумбияда ёлланган жиноятчилар чегарадаги Кукута шаҳрига турли жойлардан келган. “Улардан биридан қаердан келганини сўрашганда, Кукутадан минг километр олисдаги Медельиндан келганини айтган”, деб таъкидлаб ўтган Мадуро.

“Бу жиноятчидан Кукутадаги кўприкда интервью олинган. У Венесуэлага биринчи марта келаётгани ва у ерга ҳукуматни қўпориш учун кетаётганини айтган. Шунингдек, мухолифат ёллаган венесуэлалик жиноятчилар суратлари ҳам эълон қилинган”, деб қўшимча қилган Венесуэла президенти.