«Реал» мураббийларидан бири клубни танқид қилгани учун ишдан бўшатилди, унинг ўрнига Рауль тайинланди

«Реал»нинг собиқ футболчиси Альваро Бенито клубнинг 16-18 ёшли футболчилардан иборат жамоаси - «Juventil B» мураббийи лавозимидан озод этилди.

Marca хабарига кўра, Бенито ўз клубини Испания кубоги ярим финалида «Барселона»га йирик ҳисобда ютқазганини танқид қилгани учун ишдан бўшатилган. У «Cadena Ser» радиоси ва «Movistar» телеканали эфирида эксперт сифатида чиқиш қилган.

Альваро Бенито ўз сўзида, жумладан, шундай деган: «Винисиус ҳаммани ҳайрон қолдиряпти, у ҳали ёш, лекин жамоа ўйинида дисбаланс келиб чиқишига сабаб бўлмоқда. Муаммо шундаки, таркибда Каземиро ва Кроос каби футболчилар бор, улар бир дақиқа бўлсин тайинли ўйин кўрсатишмади».

Эндиликда Бенитонинг ўрнида Рауль Гонсалес Бланко иш бошлайди. «Реал» тарбияланувчиси клуб тизимида 16 йил (1994-2010) тўп тепган. Асосий жамоа сафида у 520та ўйинда қатнашиб, 228та гол урган; 16та жамоавий соврин соҳиби бўлган. У Испаниянинг 6 карра чемпиони, 3 карра ЕЧЛ ғолиби саналади.