Баҳодир Жалолов жиддий рақибга қарши жанг қилади

Профессионал бокснинг ўта оғир вазн (+90,7 кг) тоифасида рингга чиқаётган ўзбекистонлик Баҳодир Жалолов (4-0, 4 КО) 15 март куни АҚШда ўзининг бешинчи жангини ўтказади.

GoSport.uz нашри боксчининг ўзига асосланиб маълум қилишича, Жалолов шу куни колумбиялик Сантандер Сильгадога (28-6, 22 КО) қарши рингга чиқади. Жанг Калифорния штатининг Тюстин шаҳридаги Маркони автомобиллар музейи саройида бўлиб ўтади.

Маълумот учун, Сильгадо ўз вақтида биринчи оғир (-90,7 кг) вазн тоифаси рейтингида биринчи ўринга кўтарилган ва 2012 йилда ўша вақтларда чемпион бўлган россиялик Денис Лебедевга қарши WBA чемпионлик камари учун рингга чиққан, аммо имкониятни бой берганди.

Бундан ташқари, Сильгадо бир неча марта иккинчи даражали камарлар учун жангларда иштирок этган.

Эслатиб ўтамиз, Баҳодир сўнгги марта 2018 йилнинг 8 декабрь куни Маркус Валентинга қарши рингга чиқиб, рақибини биринчи раунддаёқ нокаутга учратганди.