Қўшимча функционаллар
-
Тунги кўриниш
АҚШ ва Канада ҳам ниҳоят Boeing 737 MAX парвозларини тўхтатди: Boeing’нинг ўзи барчага шуни тавсия қилмоқда
АҚШ президенти Дональд Трамп зудлик билан якшанба куни Эфиопияда юз берган авиаҳалокат туфайли Boeing 737 MAX 8 ва MAX 9 йўловчи самолётларининг парвозларини тўхтатиш ҳақида буйруқ берди.
«Парвозлар алоҳида кўрсатма берилгунга қадар тўхтатилади. Айни пайтда осмонда бўлиб турган Boeing 737 MAX учоқларининг эксплуатацияси улар манзилга етиб борганидан сўнг тўхтатилади», — деган Трамп Оқ уйдан туриб берган баёнотида.
Америка президенти, шунингдек, АҚШ фуқаролик авиацияси федерал бошқармаси яқин соатлар ичида бу борада баёнот билан чиқишини ҳам айтиб ўтди.
АҚШ, Европа Иттифоқи ва жаҳоннинг кўплаб давлатлари ортидан Канада ҳам Boeing корпорациясининг энг сўнгги русумдаги тор фюзелажли самолётлари парвозига вақтинчалик чеклов жорий этган. Бу ҳақда CBC телеканали Канада транспорт вазири Марк Карнога асосланиб хабар тарқатган.
Вазирнинг қайд этишича, ҳукумат аъзоларига чоршанба куни эрталаб самолёт борасидаги янги маълумот келиб тушгач, шундай қарорга келинган.
Boeing корпорациясининг ўзи ҳам 737 MAX парвозларининг сақланиб қолишига аминлигини билдирган ҳолда, жамоатчилик манфаатларини кўзлаб АҚШ федерал авиация агентлигига мазкур моделдаги барча самолётлар парвозини тўхтатишни тавсия қилган, дейилади компания сайтида.
«Boeing аввалгидек, 737 MAX самолётларининг хавфсиз эканлигига ишончи комил. Бироқ, АҚШ федерал авиация агентлиги (FAA) ҳамда АҚШ транспортда хавфсизлик бўйича миллий кенгаш (NTSB), Аваиация ҳокимиятлари ва уларнинг бутун жаҳондаги мижозлари билан маслаҳатлашувлардан сўнг, Boeing кучайтирилган хавфсизлик чоралари ва мазкур ҳаво кемасининг хавфсизлиги масаласида авиация ҳамжамиятини тинчлантириш учун FAA’га бутун жаҳон бўйлаб B-737 MAX’нинг 371 самолётдан иборат оиласи парвозларини вақтинчалик тўхтатишни тавсия қилди», — дейилади Boeing хабарномасида.
Якшанба куни эрталаб Ethiopian Airlines авиакомпаниясининг бортида 157 киши, жумладан 8 нафар экипаж аъзолари бўлган Boeing 737 MAX самолёти Эфиопиянинг Дэбрэ-Зэйт шаҳри яқинида авиаҳалокатга учраган. Самолёт бортида бўлган 35 та давлат фуқароларининг барчаси ҳалок бўлишган.
Бу Boeing компаниясининг тор фюзелажли энг сўнгги русумдаги самолётининг сўнгги беш ой ичида иккинчи бор ҳалокатга дучор бўлишидир: 2018 йилнинг 29 октябрида Индонезиянинг Lion Air компанияси лайнери ҳам ҳалокатга учраган ва 189 кишининг ўлимига сабабчи бўлган эди. Мазкур авиаҳалокатдан сўнг Индонезия парламенти ҳаттоки Lion Air авиакомпаниясидан янги Boeing’лар сотиб олмасликни талаб қилган эди.
Якшанба кунги авиаҳалокатдан сўнг жаҳоннинг кўплаб авиакомпаниялари Boeing 737 Max 8 самолётларидан фойдаланишни вақтинча чеклашди. Жумладан, Ўзбекистонга худди шу типдаги самолётларда 11 март куни қатновларни бошлаган БАА лоукостери FlyDubay ҳам мазкур самолётлардан фойдаланишни вақтинча чеклади.
13 март санасидан Ўзбекистон ҳудудидаги аэропортлар Boeing 737 MAX 8 ва 737 MAX 9 типидаги ҳаво лайнерларини қабул қилмаслиги ҳам эълон қилинди.
